ராஜீவை கொன்றது சரியா என கேட்கலாமா?

புலிகள் ராஜீவை கொன்றார்கள் என்பது உண்மை. அதை நாம் மறுக்க வேண்டியதில்லை. மறுப்பது என்பதே அது ஒரு குற்றம் என்கிற எண்ணத்தில் இருந்து வருகிறது. இது அவசியமற்ற ஒன்று. ஏன் எனக் கூறுகிறேன்.

புலிகளின் கண்ணோட்டத்தில் இருந்து ராஜீவ் படுகொலையை ஒரு பெருங்குற்றமாக நான் கருதவில்லை (அவர்கள் அதற்காக பிற்பாடு வருந்தினாலும் கூட). புலிகள் வன்முறையை பின்பற்றிய ஒரு போராட்ட அமைப்பு. அவர்களின் தர்க்கப்படி கொலை ஒரு குற்றமல்ல. அதே தர்க்கப்படி ராஜீவ் கொலையும் கூட குற்றமல்ல தான். அப்படி நினைக்காத பட்சத்தில் நாம் முழுக்க புலிகளின் வரலாற்று பங்கை மறுக்க வேண்டி இருக்கும். ஆக இங்கு நாம் புலிகள் கொல்லவில்லை என வாதிடும் போது அது ஒரு குற்றம் எனும் அச்சமும் குற்றவுணர்வும் பின்னே உள்ளது. 

வன்முறை குற்றமென்றால் அவ்வழியை போராட்டத்துக்கு தேர்ந்தெடுத்த சுபாஷ் சந்திர போஸ், பகத் சிங் போன்ற விடுதலைப் போராட்ட தியாகிகளை நாம் ஏற்க முடியாமல் போகும். எல்லோருக்கும் ஒரே தர்க்கம் பொருந்தாது. ஒருவர் கண்ணோட்ட்த்தில் போராட்ட வழிமுறையாக இருப்பது இன்னொருவருக்கு குற்றமாகும். நாம் ராஜீவ் கொலையை புலிகளின் கண்ணோட்டத்தில் இருந்து பார்க்கலாம். அதில் அவர்களுக்கு ஒரு நியாயம் இருந்த்து என யோசிக்கலாம். கொல்லுவதே கூடாது என்றால் நாம் மனிதர்களை கொல்ல என்றே கோடிக்க்ணக்கான ஆட்களையும் ஆயுதங்களையும் ராணுவம் எனும் பெயரில் நிறுவி வைத்திருப்பதை எப்படி நியாயப்படுத்துவது?

ஆக நாம் எக்கொலையையும் நியாயப்படுத்த முடியாது. தேவையும் இல்லை. விடுதலைப்புலிகளோ, அல் கொய்தாவோ, மாவோயிஸ்டுகளை, ராணுவமோ, போலீசோ – இவர்கள் நிகழ்த்தும் கொலைகளின் தர்க்கத்தின் அவர்களின் தரப்பில் இருந்து புரிந்து கொள்ள முயல்வோம். அதை மட்டுமே நம்மால் செய்ய முடியும். இல்லாவிட்டால் கண்மூடித்தனமாக நாம் செய்யும் குற்றங்களை மறந்து விட்டு அடுத்த தரப்பினரை மட்டும் கொலைகார்ராய் பார்ப்போம். அவர்கள் நம்மை கொலைகார்ராய் பார்ப்பார்கள்.

Value ethics எனும் ஒரு ஆய்வு முறையை அரிஸ்டாட்டில் உருவாக்கினார். ஒருவர் கொலை செய்தால் அதை மூன்று வழிகளில் பார்க்கலாம்.

1.. கொல்லுவது குற்றம். ஆகவே கொன்றவர்களை தண்டிக்க வேண்டும். இந்த தர்க்கத்தை பயன்படுத்தி ராணுவம், காவல்துறையை கூட நாம் குற்றவாளி ஆக்க முடியும். எதிரியை தேசபாதுபாப்புக்காக கொன்றால் கூட குற்றம் தாம்.

2. கொல்வது சட்டத்துக்கு புறம்பானது. அதனால் மட்டுமே அது குற்றம். இங்கு யாரை, எதற்கு கொல்வது என வரையறுக்கலாம். தேசபாதுகாப்புக்காக ராணுவமும், சுயபாதுகாப்புக்காக காவல் துறையும் கொல்லலாம் என விதி வகுக்கலாம். இது சார்பு நிலை உள்ள தர்க்கம்.

3. கொலை செய்வது ஒருவரைப் பற்றி நமக்கு கூறுவது என்ன? அவரது கோணம், உளவியல், நிலைப்பாடு என்ன? இப்படி ஆய்வது அரிஸ்டாட்டிலின் பாணி. புலிகள் கொன்றார்கள் என்றால் அதற்கான தேவை, நெருக்கடி, உளவியல் என்ன என யோசிக்கலாம் என்பார் அரிஸ்டாட்டில். இது ஒரு பரந்துபட்ட அணுகுமுறை.

குற்றத்தின் உளவியலை மட்டும் பார்த்தால் குற்றங்கள் பெருகாதா என நீங்கள் கேட்கலாம். தண்டனையால் குற்றங்கள் குறைவதில்லை. அப்படி நடந்ததாய் வரலாறு இல்லை. தூக்குதண்டனை பற்றிய தன் நூலில் ஆல்பர்ட் காம்யு இது குறித்து விரிவாக பேசுகிறார். குற்றத்தை வரையறுத்து தண்டிப்பது நம் பழிவாங்கும் மனதை திருப்திப்படுத்தியும் மக்களை அச்சுறுத்தி ஒடுக்கவும் தான்.

இன்றைய நிலையில் யார் குற்றவாளி என ஒரு வரையறையை உருவாக்குவது குழப்பத்தை அதிகரிக்கும், குறுகின மனப்பான்மையை, முன் எண்ணங்களை உருவாக்கும் நாம் யார் பக்கம் என நாம் யோசிக்கலாம். நம் பக்கத்து நியாயத்தை, அது குற்றமாகவே இருந்தாலும், அதை ஆதரிக்கலாம். அது நம் இருப்பை காப்பாற்ற அரசியல் செய்ய உதவும். அரசியல் இன்றி இனி நாம் நம்மை காப்பாற்றிக் கொள்ள முடியாது. மறைமுகமாக அதைத் தான் எல்லோரும் பண்ணுகிறார்கள். நம் எதிரிகளும் கூட. 

அதனால் தான் ராஜீவ் கொலை வழக்கில் நால்வரையும் விடுவிக்கலாமா என்கிற சர்ச்சை மேலும் மேலும் குழப்பமாகிறது. நமக்கு அவர்கள் அப்பாவிகளாகவும், வடக்கில் இருப்பவர்களுக்கு கொலையாளிகளாகவும் படுகிறார்கள். நான் கல்லூரியில் படிக்கையில் விடுதியில் சில வடகிழக்கு மாணவர்கள் படித்தார்கள். அவர்களில் சிலருக்கு இந்தியா மீது கடும் கோபம் இருந்த்து. இந்தியாவை ஒரு எதிரி நாடாக பார்த்தார்கள். இத்தனைக்கும் அவர்கள் இந்தியாவின் ஒரு பகுதி தான். அவர்களை பேதைகள் அல்லது துரோகிகள் என நாம் கூற முடியாது. அவர்களின் தர்க்கத்தை, உளவியலை புரிந்து கொள்ள முயலலாம்.

மற்றபடி புலிகள் ராஜீவை கொன்றது சரியா, இந்நால்வரும் குற்றவாளிகளா என்கிற விவாதத்திற்கு முடிவே இல்லை. பேஸ்புக்கில் சர்ச்சிக்கவும், டிவி டி..ஆர்.பி ரேட்டிங்கை உயர்த்தவும் மட்டுமே உதவும். இதை அரிஸ்டாட்டில் அன்றே புரிந்திருந்தார். நமக்கு ஒரு மாற்று பார்வையும் தந்தார். அவர் சொல்வது இது தான்: ஒரு பறவை பறக்கிறது. அது எப்படி இங்கு பறக்கலாம் என கேட்காமல், எப்படி பறக்கிறது, பறக்கும் பொது அதன் மனமும் உடலும் எப்படி செயல்படுகிறது, இதில் இருந்து நாம் என்ன அறியலாம் எனக் கேளுங்கள். அதுவே பயன்படும்!